امیرالمومنین حضرت علی (ع) کے یوم ولادت کے مبارک موقع پر علامہ ساجد نقوی کا پیغام Reviewed by Momizat on . ملی یکجہتی کونسل پاکستان کے قائمقام سربراہ علامہ سید ساجد علی نقوی نے کہا ہے کہ خدا تعالٰی اور پیغمبر اکرم (ص) پر ایمان رکھنے والوں کے لئے 13 رجب المرجب کا دن ب ملی یکجہتی کونسل پاکستان کے قائمقام سربراہ علامہ سید ساجد علی نقوی نے کہا ہے کہ خدا تعالٰی اور پیغمبر اکرم (ص) پر ایمان رکھنے والوں کے لئے 13 رجب المرجب کا دن ب Rating:
You Are Here: Home » Urdu - اردو » امیرالمومنین حضرت علی (ع) کے یوم ولادت کے مبارک موقع پر علامہ ساجد نقوی کا پیغام

امیرالمومنین حضرت علی (ع) کے یوم ولادت کے مبارک موقع پر علامہ ساجد نقوی کا پیغام

امیرالمومنین حضرت علی (ع) کے یوم ولادت کے مبارک موقع پر علامہ ساجد نقوی کا پیغام
ملی یکجہتی کونسل پاکستان کے قائمقام سربراہ علامہ سید ساجد علی نقوی نے کہا ہے کہ خدا تعالٰی اور پیغمبر اکرم (ص) پر ایمان رکھنے والوں کے لئے 13 رجب المرجب کا دن بہت بڑی خوشی کا دن ہے کیونکہ اس دن نفس رسول (ص)، امیر المومنین حضرت علی ابن ابی طالب (ع) کعبے کے اندر متولد ہوئے۔ قرآن کریم کی کثیر آیات ایسی ہیں جن کا اولین شان نزول اور ان کا کامل مصداق امیر المومنین (ع) کی ذات ہے۔ مفسرین نے اپنی تفاسیر میں اس شان اور مصداق کو کھول کر بیان کیا ہے، دوسری طرف پیغمبر گرامی قدر نے امت کے سامنے علی (ع) کے جو فضائل بیان کئے وہ بہت بڑا علمی، فکری اور عقیدتی ذخیرہ ہے، کتب احادیث پیغمبر گرامی قدر (ص) کی زبانی آپ کے فضائل سے مزین ہیں۔
ان خیالات کا اظہار انہوں نے تاجدار ولایت، جانشین رسول حضرت علی ابن ابی طالب (ع) کے جشن ولادت کے موقع پر اپنے پیغام میں کیا۔ انہوں نے کہا کہ رسول اکرم (ص) نے خاص عنایات اور توجہ کے ساتھ آپ کی تربیت فرمائی اور انہیں اسلام کی حفاظت اور ترویج کے لئے خود تیار فرمایا، یہی وجہ ہے کہ زندگی کے مختلف شعبوں اور تمام انسانی مسائل میں علی (ع) کی ذات مرکز اور مرجع تسلیم کی گئی اور تمام صحابہ کرام نے تمام مسائل میں آپ کی طرف رجوع کیا۔ قرآن کی تفسیر، احادیث پیغمبر (ص)، مختلف رائج ادبی و دیگر علوم، ولایت و روحانیت اور دیگر تمام میدانوں میں آپ کی ذات سرچشمہ فیض قرار پائی، جبکہ شجاعت و بہادری ان کی ایسی ایک صفت اور صلاحیت ہے جس میں وہ اپنی مثال آپ تھے، انسانوں کے درمیان ان کی ذات بطور نمونہ پیش کی جاسکتی ہے۔
علامہ ساجد نقوی نے کہا کہ امیر المومنین کے اجتماعی و سیاسی مسائل میں سیاست علوی ایک ایسا باب ہے جس کے گہرے مطالعے کی ضرورت ہے، بحرانی حالات میں انہوں نے جس طرح کامیاب حکمرانی کی اور منفرد و جامع طرز جہاں بانی عطا کیا، اس سے آج بھی مختلف ممالک میں استفادہ کیا جا رہا ہے، بالخصوص مالک اشتر کے نام آپ کا وصیت نامہ ہدایت اور رہنمائی کا سرچشمہ ہے، جس سے پاکستانی ریاست کو بھی استفادہ کرنا چاہیے۔ علامہ ساجد نقوی نے کہا حضرت علی (ع) کی حیات طیبہ مسلمانان عالم کے لئے نمونہ عمل ہے، ہم سب کو چاہیے کہ ہم اس کو اپنائیں، صبر و تحمل اور عمل و استقامت کا دامن تھام کر آپ کی تعلیمات کی روشنی میں آپ کے دیئے ہوئے نظام کی تشکیل کے لئے کوشاں رہیں، تاکہ انسانیت کو فلاح و نجات سے ہمکنار کیا جاسکے۔ مسلمانان عالم بالخصوص مسلمانان پاکستان جشن ولادت امام (ع) نہایت تزک و احتشام سے منائیں اور مولود کعبہ کے افکار و اقوال کی روشنی میں اتحاد و وحدت کا مظاہرہ کریں اور پاکستان کو عالم اسلام کی خواہش کے مطابق ایک مکمل اسلامی فلاحی ریاست میں ڈھالنے کے لئے اپنا کردار ادا کریں، تاکہ پاکستان کے دشمن اور پاکستان میں موجود ان کے آلہ کاروں کی وطن عزیز کے خلاف تمام تر سازشیں ناکام ہوجائیں۔

About The Author

Number of Entries : 6115

Leave a Comment

You must be logged in to post a comment.

© 2013

Scroll to top